🇨🇿繼續回味捷克之旅🇨🇿
我哋兩個去旅行一向唔勤力，好懶做資料搜集。傾向隨心，睇吓個地方會帶俾我哋咩驚喜，而今次就遇到呢間網紅餐廳。
古城地方唔大，啲路九曲十三彎，轉入其中一條窄巷之中見到呢間餐廳。一開始被餐廳內嘅大火爐吸引，未食早餐，划完艇見肚餓，又有排未夠鐘上大巴，不如食返個 brunch 喇～
眼見戶外位已經坐滿曬人，就問問呢枱只有一個中國男生搭枱，坐低試試。當時只係 11 點幾，12 點都未夠。坐低無耐就有成團 一行 20 人遊客走入去，點知個個都頭耷耷走返出嚟。原來餐廳裡面嘅枱已經 full booking，walk in booking 最快要等到下午 2 點。我哋心裡暗嘆「好彩」，同時又好驚奇：嘩，原來呢度咁受歡迎？！
同枱嘅哥哥仔就搭訕話：「你哋唔知咩？呢間係網紅餐廳嚟㗎！個個都話呢間餐廳係必食之選。」我哋呢兩個 80 後同聲問：「網紅？咩嚟㗎？」哥哥仔續道：「即係微博囉，好多大陸旅客都喺微博推介呢間餐廳㗎，又有特色又抵食喎。」跟住佢仲好熱情咁介紹餐牌，講解佢喺網上睇返嚟嘅心得。見哥哥仔咁熱情，就聽佢推介，兩個人點一個午市推介套餐包括：
🍞 蒜蓉芝士麵包湯 ：
素聞捷克菜湯類最為特色，一試果然名不虛傳。蒜香味濃，同時仍保留湯頭清甜。湯汁好快被麵包吸收，吸收曬湯汁精華嘅麵包變得軟淋淋，配上內藏嘅拉絲芝士，實在令人欲罷不能。
🍖 傳統爐烤豬扒 250g：
食完麵包湯其實我哋都飽咗一半，但聞到柴木香，眼見送上嚟嘅豬扒燒得剛好，味蕾又再被刺激起嚟。芥末乳酪醬減少油膩感，再配上酸菜同薯餅，眨眼就被我哋聯手消滅。講到薯餅，薯餅係歐洲地區相當普遍嘅主食，不同國家製法亦有所不同。而捷克的薯餅特別煙韌，相當啱我哋口味。
🍯🍰 家傳秘製蜂蜜蛋糕 ：
相片都真實反映到前菜同主菜份量幾足，食到呢度其實真係飽曬。而且天氣相當熱，胃口不大。本來只打算食兩啖，不過當我哋將第一啖送入口後，就改變心意喇⋯因為真係太好味啦！
最後埋單，呢個 3 course meal 盛惠 290 捷克克朗，即係港幣 100 元。噢賣噶 🤯🤯🤯 抵食成咁，封佢為網紅餐廳真係實至名歸 👏🏻👏🏻👏🏻
後嚟睇返，原來佢嘅烤豬手仲正喎！比德國版嘅細仔啲，但又滑啲、嫩啲、Juicy 啲、外脆內軟咁喎！我哋真係食唔落啦，留俾你哋去試啦！
#捷克 #童話小鎮 #遊記
Search